تہران 18دسمبر(ایس او نیوز ؍آئی این ایس انڈیا)ایرانی میڈیا کے مطابق تہران حکومت جوہری بحری جہاز بنانے کے پلان کی تمام تر تفصیلات اگلے تین مہینوں کے درمیان اقوام متحدہ کے جوہری واچ ڈاگ ادارے کو پیش کر دی گی۔ انٹرنیشنل اٹامک انرجی ایجنسی کے سربراہ یُوکیو امانو ان دنوں ایران کے دورے پر ہیں۔ ایران کے دورے کے دوران امانو نے ایرانی جوہری ایجنسی کے سربراہ علی اکبر صالحی کے ساتھ ملاقات میں عالمی طاقتوں کے ساتھ طے پانے والی جوہری ڈیل کے نفاذ پر توجہ مرکوز کی۔ ایران کے جوہری بحری جہاز بنانے کے منصوبے پر امانو نے کہا کہ فوری طور اس معاملے پر جواب دینا ممکن نہیں ہے کیونکہ اس میں انجن کی قوت کو اہمیت حاصل ہوتی ہے۔
